Efekti Messi, MLS vendos rekordin historik të tifozëve në stadiume

Më shumë se 11 milionë tifozë ndoqën Major League Soccer këtë sezon. Këtë e ka bërë të ditur vetë Liga Amerikane e Futbollit. Rekordi i mëparshëm ishte 10.9 milionë shikues. Liga, në një deklaratë për mediat, saktësoi se mesatarisht kanë qenë 23,240 tifozë për ndeshje.

Sipas MLS, në këtë rritje të numrit të tifozëve ka kontribuar ardhja e disa yjeve ndërkombëtarë, ku spikat Lionel Messi. Prania e të cilit në kampionat shpesh herë i ka shtyrë skuadrat të luajnë në stadiume më të mëdha për shkak të numrit më të madh të tifozëve.

“Ardhja e yjeve ndërkombëtarë të futbollit, puna e klubeve për të krijuar paketa unike të biletave si dhe përvoja ndër vite, janë ndër arsyet kryesore për rritjen e vazhdueshme të frekuentimeve rekord në të gjithë MLS”, njoftoi Liga. Rekordi i ri është arritur ndërkohë që sezoni i rregullt është ende duke u zhvilluar. Për të tretin vit radhazi numri i tifozëve në stadium i kalon 10 milionë fansa.