Kryeministri i Libanit thirrje OKB-së të ndalojë agresionin e Izraelit

Kryeministri i përkohshëm i Libanit Najib Mikati i ka kërkuar Kombeve të Bashkuara të bëjnë presion ndaj Izraelit që të ndalojë “agresionin” ndaj vendit të tij.

Ai i tha kabinetit të tij se Izraeli po planifikon të “shkatërrojë fshatrat dhe qytetet libaneze” dhe kërkoi një ndërhyrje nga Këshilli i Sigurimit i OKB-së dhe “vendet me ndikim”, thuhet në një deklaratë në X.

Kryeministri në detyrë akuzoi gjithashtu Izraelin se kishte një “plan shkatërrues” dhe se po kryente një “luftë shfarosëse” kundër Libanit.

Të dielën, Sekretari i Përgjithshëm i Kombeve të Bashkuara, Antonio Guterres tha se ai ishte i shqetësuar se Libani mund të transformohet në një “një Gazë tjetër” në mes të sulmeve të përshkallëzuara midis Izraelit dhe Hezbollahut.

Shefi i OKB-së i tha Fareed Zakaria të CNN në një intervistë ekskluzive se shpërthimi i fundit i pajisjeve të komunikimit në Liban do të thotë se ekziston një “potencial për një përshkallëzim shumë më të fortë”, për të cilin ai ka frikë se mund të jetë një “tragjedi shkatërruese për botën”.

Presidenti Joe Biden tha gjithashtu se ai mbetet i shqetësuar për tensionet e vazhdueshme në Lindjen e Mesme mes frikës se përshkallëzimi i sulmeve midis Hezbollahut dhe Izraelit mund të çojë në një konflikt më të gjerë rajonal.

“Ne do të bëjmë gjithçka që mundemi që të mos shpërthejë një luftë më e gjerë. Dhe ne ende po shtyjmë fort,” u tha Biden gazetarëve të dielën në South Lawn.