Zbardhen detaje nga rasti u dhunimit të 74-vjeçares nga i biri dhe nusja e djalit

74-vjeçarja me iniciale V.M. më datë 19 shtator ora 19 e 30 ka shkuar në komisariatin e policisë nr.5 dhe ka bërë kallëzim se djali i saj shtetasi E.M. dhe nusja e djalit shtetasja F.M. e kanë dhunuar fizikisht. Menjëherë pas kallëzimit, komisariati nr.5 ka arrestuar djalin e 74- vjeçares së dhunuar, E.M. 47 vjeç për veprën penale "Dhunë në familje".

Po ashtu policia ka proceduar edhe autoren tjetër të dhunës, nusen e djalit të 74-vjeçares, shtetasen F.M. 45 vjeçe, e cila akuzohet nga policia për dhunë në familje por edhe për "Mbajtje e armëve të ftohta". 45-vjeçarja nuk është arrestuar por është vetëm proceduar në gjendje të lirë, për shkak të fëmijëve të mitur që ka për të mbajtur.  Nga ana e Policisë 74-vjeçares i është plotësuar kërkesa për urdhër mbrojtjeje si dhe është pajisur me vendim mjeko-ligjor, kur vërtetohet që është dhunuar.