Serbia nxjerr ushtrinë, ‘kërcënon’ Evropën/ S’përmbahet Vuçiç: Jemi ushtria më e fortë!

 “Unë njoh 15 vende që së bashku kanë aq tanke sa ka ushtria jonë”. Këtë fjali përdori Presidenti Aleksandër Vuçiç për të glorifikuar forcën e ushtrisë së Serbisë, teksa i drejtohej të pranishmëve që ndoqën stërvitjen e quajtur “Flamuri 2024”, e cila po zhvillohet në Batajnicë me rastin e Ditës së Bashkimit, Lirisë dhe Flamurit Kombëtar.

“Dua të falënderoj të gjithë të ftuarit dhe të them se jam krenar për ushtrinë dhe gjithçka që kemi bërë. Edhe pse jam dikush që kritikon gjithmonë, është normale që të krenohem për shumë gjëra. Sot kemi 4 herë e gjysmë më shumë dronë të shfaqur se herën e kaluar”, tha Vuçiç.

Nga aeroporti ushtarak "Milenko Pavloviç", ku u ekspozuan armatime dhe pajisje të shumta moderne ushtarake, Vuçiç gjeti momentin të mburrej për numrin e tankeve, duke thënë “jemi të parët ose të dytët në Evropë”, ndërsa shtoi se po blejnë versionin e fundit të avionëve Rafal.

“Unë njoh 15 vende që së bashku kanë aq tanke sa ne. Unë isha këtu në vitin 2013 dhe as që mund ta ëndërronim këtë. Askush nuk e tregoi HQ-17, kemi radarë të rinj... 50% e prodhimit është në Serbi, dhe kjo na bën një nga ushtritë më të armatosura në Evropë në raport me popullsinë. Është versioni i fundit 4.1, i cili është përgatitur për ushtrinë franceze një muaj më parë. Pra, versioni më i fundit dhe më modern. Kjo nuk është për ne për shfaqje dhe për të bërë foto, por për të penguar në fakt ata që donin të bënin agresion ndaj vendit tonë”, theksoi Vuçiq.

Ndër të tjera në Batajnicë parakaluan pjesëtarë të Brigadës së 72-të të Operacioneve Speciale, Brigada 63 e Parashutistëve, departamenti ‘Cobra’, e po ashtu helikopterë luftarakë Mi-35, të njohur edhe si “tanket fluturuese”, por edhe avionët “MIG 29”./ Tanjug.