Pas ndalimit, X 'rikthehet' në Brazil, platforma del me deklaratë për gabimin

Disa përdorues të X në Brazil ishin edhe një herë në gjendje të hynin në platformën e rrjeteve sociale të mërkurën, pavarësisht një ndalimi të vendosur nga gjyqësori i vendit muajin e kaluar.

Por, rivendosja e platformës në Brazil ishte e paqëllimshme, ka njoftuar një zëdhënës i X në një deklaratë.

“Për të vazhduar ofrimin e shërbimeve optimale për përdoruesit tanë, ne ndryshuam ofruesit e rrjetit. Ky ndryshim rezultoi në një rivendosje të paqëllimshme dhe të përkohshme të shërbimit për përdoruesit brazilianë”, tha zëdhënësi.

“Ndërsa presim që platforma të jetë sërish e paarritshme në Brazil, ne vazhdojmë përpjekjet për të punuar me qeverinë braziliane për t’u kthyer shumë shpejt”, shtoi ai.

“Gjithçka që ndodhi gjatë ditës na bëri të besojmë se ishte me qëllim”, tha Basilio Rodriguez Perez, këshilltar i ABRINT, grupi kryesor tregtar i vendit për Ofruesit e Shërbimeve të Internetit (ISP).

ABRINT tha se X u zhvendos në serverët e pritur nga Cloudflare dhe se dukej se po përdorte protokolle dinamike të internetit (IP) që ndryshojnë vazhdimisht, duke i treguar atij se ndryshimi në qasjen për përdoruesit brazilianë ishte i qëllimshëm.

Në të kundërt, sistemi i mëparshëm ishte mbështetur në IP specifike që mund të bllokoheshin më lehtë, shkruan BBC.

Basilio Rodriguez Pérez, këshilltar i ABRINT, tha se ato IP dinamike mund të lidhen gjithashtu me shërbime kritike brenda Brazilit.