Kanosi pronarin e mobilierisë, 55-vjeçari arrestohet duke marrë 4 mijë €
Në prangat e policisë ka rënë një 55-vjeçar, i cili në bashkëpunim me një 23-vjeçar kishte kërcënuar pronarin e një mobilierie në Elbasan duke i kërkuar 4 mijë euro.
Sipas burimeve për SYRI-n, i arrestuar është shtetasi Përparim Balliu, 55-vjeç.
Pronari i mobilierisë në Elbasan ka denoncuar në polici se ishte kërcënuar nga dy persona të cilët i kërkonin 4000 euro.
Nën hetim është vënë dhe 23 vjeçari si bashkëpunëtor i 55-vjeçari të arrestuar.
Njoftimi i policisë/ Elbasan
Si rezultat i reagimit të menjëhershëm, pas denoncimit të një 50-vjeçari, se kanosej nga 2 shtetas, për t’iu dhënë 4000 euro, specialistët për Hetimin e Krimeve të Rënda të DVP Elbasan kryen një hetim proaktiv, në bashkëpunim me Prokurorinë e Elbasanit, dhe finalizuan operacionin policor të koduar “Mobilieri”. Në kuadër të këtij operacioni u arrestua në flagrancë, teksa merrte shumën e eurove, në mobilierinë e 50-vjeçarit, shtetasi P. B., 55 vjeç. Gjithashtu, si bashkëpunëtor për rastin, u identifikua dhe u shpall në kërkim shtetasi A. K., 23 vjeç. Punohet për kapjen e tij.