Tucker Carlson kritikon Putinin
Tucker Carlson kundërshtoi justifikimin e presidentit rus Vladimir Putin për pushtimin e Ukrainës, duke pretenduar se "denazifikimi" i vendit ishte "një nga gjërat më idiote që kam dëgjuar ndonjëherë".
Duke folur me prezantuesin Lex Fridman në një episod podcast-i të martën, Carlson foli për intervistën e tij të diskutueshme me Putinin të bërë në fillim të këtij muaji. Ish-ylli i Fox News është përballur me një mori reagimesh për takimin me udhëheqësin e Kremlinit, që ishte hera e parë që Putini pranoi të ulet për një intervistë me personelin e medias perëndimore që nga fillimi i luftës në Ukrainë.
Intervista e Putinit nga Carlson-i preku një listë të gjatë temash, nga një mësim i gjatë i historisë ruse te mendimet e Putinit për zgjedhjet e ardhshme presidenciale në SHBA. Carlson e dha gjithashtu përshtypjen e tij të parë për Putinin si dikush që "dukej nervoz", duke i thënë Fridmanit se presidenti rus "hyri në intervistë si një student shumë i përgatitur".
Fridmani i kërkoi në mënyrë specifike Carlson-it mendimin e tij për justifikimin e Putinit për vazhdimin e luftës në Ukrainë, që pjesërisht është për të arritur "denazifikimin" e vendit. Presidenti ukrainas Volodymyr Zelensky, i cili është hebre, ka hedhur poshtë vazhdimisht pretendimet e Kremlinit se qeveria e Kievit është hapur "pro-naziste".
"Ishte një nga gjërat më idiote që kisha dëgjuar," i tha Carlson-i Fridman-it. "Nuk e kuptova se çfarë do të thoshte."
"E urrej gjithë atë bisedë sepse nuk është reale", vazhdoi ai. "Është thjesht ad hominem. Është një mënyrë për të shoqëruar dikë me një regjim të lig që nuk ekziston më."
Nazizmi, sipas Fjalorit Merriam-Webster, përshkruan tërësinë e doktrinave të mbajtura nga lëvizja e Partisë Naziste të udhëhequr nga Adolf Hitleri në Gjermani. Sipas Carlson-it, nazizmi nuk ekziston më sepse "është i pandashëm nga kombi gjerman".
"Unë jam shumë anti-nazist," i tha ai Fridmanit. "Unë thjesht po them se nuk ka një lëvizje naziste në vitin 2024. Është një mënyrë për t'i quajtur njerëzit të këqij."
Putin është ankuar gjithashtu për bisedën e tij me Carlson, duke i thënë gazetarit rus Pavel Aleksandrovich Zarubin se ai ishte përgatitur që ish-prezantuesi i televizionit "të sillej në mënyrë agresive dhe të bënte të ashtuquajturat pyetje të mprehta".
"Unë nuk isha i përgatitur vetëm për këtë, e doja, sepse do të më jepte mundësinë të përgjigjesha në të njëjtën mënyrë", tha Putini.
Udhëheqësi rus gjithashtu u tall në mënyrë eksplicite me Carlson-in gjatë intervistës, duke uj tallur me faktin se përpjekjet e tij për të gjetur punë në CIA ishin vazhdimisht të pasuksesshme.
Zëdhënësi i Kremlinit Dmitry Peskov u tha më parë gazetarëve se Putini i dha një intervistë Carlson-it sepse "ai ka një pozicion që ndryshon" nga mediat e tjera perëndimore./News Week - Syri.net