Marrëveshja Kosovë-Serbi/ SHBA, e zhgënjyer me mungesën e përparimit
SHBA-ja është e zhgënjyer me mungesën e përparimit dhe të vullnetit politik si nga Kosova ashtu edhe nga Serbia sa i përket zbatimit të Marrëveshjes Bazë.
Ambasada e SHBA-së në Kosovë ka thënë se SHBA-ja pret që Kosova e Serbia t'i zbatojnë plotësisht të gjitha obligimet nga Marrëveshja Bazë dhe nga aneksi i dakorduar në Ohër.
Të martën u mbush një vit nga nënshkrimi i Marrëveshjes Bazë mes Kosovës dhe Serbisë në Bruksel.
“Siç e kemi thënë shumë herë, SHBA-ja vlerëson se Marrëveshja Bazë dhe aneksi i zbatimit janë ligjërisht të obligueshme si për Kosovën ashtu edhe për Serbinë. Jemi të zhgënjyer që ka pasur mungesë përparimi apo të vullnetit politik si nga Kosova ashtu edhe nga Serbia për të ecur para me zbatimin e marrëveshjes. Qëndrimi i SHBA-së është konsistent dhe i qartë – ne presim që Serbia dhe Kosova t'i zbatojnë plotësisht të gjitha obligimet nga Marrëveshja Bazë dhe aneksi implementues, dhe ta bëjnë këtë me përkushtim dhe urgjencë. Për Kosovën, kjo do të thotë përparim urgjent në plotësimin e obligimit të kahershëm të zbatimit të Asociacionit të komunave me shumicë serbe”, ka thënë për KOHËN një zëdhënës i Ambasadës së SHBA-së.
Ambasada e SHBA-së ka kërkuar edhe bashkëpunim sa i përket zbatimit të rregullores së re të Bankës Qendrore të Kosovës, “në mënyrë që të minimizohet efekti negativ ndaj komunitetit pakicë serb në Kosovë”.
“Marrëveshja Bazë në thelb ripozicionon marrëdhëniet mes dy shteteve, për të mirë, dhe do të lehtësonte jetën e përditshme për qytetarët e të dyja shteteve në shumë aspekte. Kjo është mënyra e vetme për Kosovën që të avancojë në rrugën e saj evropiane dhe euroatlantike, të cilën e mbështesim fuqishëm. Ne vazhdojmë t’u bëjmë thirrje Kosovës dhe Serbisë të shmangin veprimet e njëanshme që përshkallëzojnë tensionet”, është thënë nga Ambasada.