Vrasja e babait/ Jepet masa e sigurisë për 3 fëmijët e viktimës, policia merr në mbrojtje nënën e tyre
Gjykata e Durrësit ka dhënë masën e sigurisë për 3 fëmijët që akuzohen se vranë babain e tyre, Pëllumb Metën, dhe e varrosën trupin e tij brenda një kasolleje.
Për Hysen Metën, mbi të cilin rëndon akuza e vrasjes në marrëdhënie familjare, fshehje dhe asgjesim kufome, si dhe armëmbajtje pa leje, u vendos masa e sigurisë arrest me burg.
Edhe për vajzën e viktimës, Hygerta Meta, e dyshuar fillimisht në momentin e arrestimit për vrasje, është vendosur masa e sigurisë arrest me burg, por vetëm për veprën penale të asgjesimit e fshehjes së kufomës.
Arrest me burg u vendos edhe për Amarildo Metën, i cili akuzohet për asgjesim dhe fshehje kufome.
Ndërkohë, Policia e Durrësit ka marrë në mbrojtje bashkëshorten e Pëllumb Metës, edhe pse ndaj saj nuk është ngritur asnjë akuzë.
Blerina Meta nuk është lejuar të merrte pjesë në ceremoninë mortore të burrit të saj, pasi policia i trembej ndonjë konflikti të mundshëm mes vëllezërve të Pëllumbit dhe kunatës së tyre. Ndërsa 49-vjeçarja po hetohet në gjendje të lirë për ngjarjen, policia e Durrësit e ka shoqëruar deri në familjen e babait të saj në Laç.
Në ceremoninë e varrimit ka marrë pjesë vetëm vajza e madhe e familjes, e martuar në Krujë, ndërsa 2 vëllezërit e saj dhe motra ndodhen pas hekurave.