Dëshmia e djalit të akuzuar për vrasjen: Babi, autoritar, i dhunshëm, donte të fejonte dhe motrën
Sot në fshatin Shënavlash të Durrësit po zhvillohet akti i fundit i dramës së familjes Meta, varrimi pas 14 ditësh i Pëllumb Metës, 49-vjeçarit të vrarë nga fëmijët e tij dhe të groposur pranë shtëpisë.
Në ceremoninë që po mbahet në shtëpinë e vëllait të të ndjerit, pasi shtëpia e tij është mbyllur sepse tri fëmijët tek të njëzetat, dy djem dhe vajza janë arrestuar ndërsa e shoqja është në procedim, mësohet se ka shkuar vajza e madhe, e martuar në një fshat tjetër dhe pa dijeni mbi ngjarjen, kurse për të shoqen nuk dihet nëse do të jetë e pranishme.
Ndërkohë, gazetarja e SYRI TV në Durrës raporton se janë mësuar tashmë disa hollësi nga rrëfimi i djalit 24-vjeçar të Pëllumbit, Hysenit, që akuzohet se qëlloi me pistoletë mbi babanë, se cilat ishin arsyet e vrasjes dhe si e kreu atë.
Hysen Meta, sipas gazetares, ka thënë se planin e ka bërë bashkë me motrën 19-vjeçare, pasi babai ishte autoritar në familje që kur ishin të vegjël dhe e kishte dhunuar vazhdimisht nënën e tyre. Ai ka theksuar se planin e bënë bashkë me motrën sepse ai donte edhe të fejonte motrën me një djalë jashtë vendit, që nuk e njihnin kush ishte.
Në momentin që i ndjeri Pëllumb Meta ka qene i shtrirë në divan, i biri e ka thirrur duke qëlluar me katër plumba në drejtim të tij.
Hyseni tha se pas vrasjes, bashkë me vëllanë, e kanë mbështjellë me plasmas dhe e kanë groposur në kasollen e lopëve kur u errësua, që të mos shiheshin nga fqinjët.
Tre ditë më pas, Hyseni ka shkuar në Polici për të denoncuar humbjen e babait të tij, pasi “nuk kishte ardhur në shtëpi pas pune”.
Policia ka nisur hetimet dhe pas pesë ditësh është gjetur makina e viktimës në Sektorin Rinia dhe në të janë gjetur gjurmët e gishtave të djalit të tij, Hysenit, duke nxitur dyshimet se 49-vjeçari mund të ishte vrarë dhe jo zhdukur.
Pas kontrolleve nga Policia në disa zona, kryesisht në Sektorin Rinia, ata janë kthyer edhe njëherë në shtëpi për të marrë dëshminë e familjarëve dhe aty është parë vajza e frikësuar që ka ndryshuar dëshminë dhe ka filluar lojëra fjalësh me vëllezërit dhe aty ka nisur ngritja e dyshimeve.
Ndërkohë, vetëm dje, është gjetur trupi i groposur i Pëllumb Metës, i zhveshur dhe mbështjellë me plasmas. Vajza Hygerta Meta tha se e kishte kryer vetëm krimin, por nuk qe bindëse pasi nuk mund ta kishte kryer vetëm atë krim. Më tej janë arrestuar edhe dy vëllezërit e saj si të përfshirë në krim.
Mbrëmjen e së premtes është gjetur edhe pistoleta pas kontrolleve të shumta, në një moçal pranë shtëpisë, ku e kishin hedhur djemtë.
Në orën 11:00, pas ceremonisë mortore, pritet të japë një deklaratë për media, edhe e ëma e fëmijëve, bashkëshortja e të ndjerit dhe të deklarojë për ngjarjen se si ka ndodhur./ar/sh/SYRI.NET