Rama dhe miku i tij, Vuçiç, nisin një lojë 'luftash' pas vizitës së Blinken

Presidenti i Serbisë, Aleksandar Vuçiç, e ka vlerësuar si “rrëqethëse” deklaratën e kryeministrit shqiptar Edi Rama se “çdo sulm ndaj Kosovës është sulm ndaj Shqipërisë”. Ai shtoi se vendi ynë “nuk do të sulmojë askënd”.

Kjo lojë fjalësh mes dy miqve vjen pas vizitës së Sekretarit të Shtetit, Antony Blinken në Tiranë.

“Sot u dëgjua nga një shtet fqinj se nëse dikush sulmon Kosovën, edhe pse nuk e di kush do të sulmonte, Shqipëria nuk do ta lejojë dhe do të jetë në atë anë. Pas një deklarate kaq të tmerrshme, dëgjohej vetëm një heshtje e madhe, aq e fortë saqë heshtja ishte e pakëndshme”, tha Vuçiç gjatë ceremonisë së Ditës së Shtetit.

“Askush nuk iu përgjigj deklaratave të tilla, imagjinoni sikur dikush nga ne ta kishte thënë këtë, do të kishit dëgjuar bubullimat e mallkimeve, fyerjeve dhe fushatave më të pista nga e gjithë bota”, shtoi Vuçiç.

Vuçiç deklaroi se Serbia do të mbrojë marrëdhëniet e saj me Evropën, por edhe se “nuk do të shkelë marrëdhëniet e saj me Rusinë apo Kinën”.

“Për sa i përket neve, nuk kemi nevojë të sulmojmë askënd dhe nuk do ta bëjmë. Ne kemi nevojë për Evropën, ndoshta jo hipokrizinë e saj, por nuk mund të bëjmë pa të”, tha Vuçiç.

Kujtojmë se kryeministri shqiptar Edi Rama tha dje në emisionin Kontekst në ATV se “çdo sulm ndaj Kosovës është sulm ndaj Shqipërisë”.

Ai tha se Kosova nuk është e vetme, jo vetëm sepse ka Shqipërinë, por sipas tij sepse ka edhe aleatë strategjikë.