Iu gjet një sasi e madhe fishekzjarrësh në një magazinë, arrestohet 32-vjeçari në Dibër
Një 32-vjeçar përfundoi në prangat e policisë së Dibrës, pas zbulimit të një magazine ku mbahej një sasi e madhe fishekzjarrësh dhe kapsolla të kontrabanduara. Policia sqaroi se ka arrestuar shtetasin, Emiljan Iskurti
Njoftimi:
Si rezultat i veprimeve intensive të shërbimeve të strukturave të Drejtorisë Vendore të Policisë në bashkëpinim me Komisariatin e Policisë Dibër, të mbështetura nga inteligjenca informative dhe të kryera në zbatim të planit të posaçëm operacional, të hartuar nga DPPSH-ja, me objekt ndalimin e zhurmave në zonat e banuara dhe për garantimin e përdorimit të lëndëve piroteknike, konform ligjeve në fuqi, në bashkëpunim të ngushtë dhe me Prokurorinë e rrethit Dibër, është zbuluar magazina e një biznesi në qytetin e Peshkopisë, ku mbaheshin qindra koli me fishekzjarre dhe kapsolla të kalibrave të ndryshëm të dyshuara të futura kontrabandë në vendin tonë, me qëllim shitjen.
Si rezultat i ndërhyrjes së menjëhershme të shërbimeve të Policisë, në këtë ambient, u kap në flagrancë shtetasi Emiljan Iskurti, 32 vjeç, banues në fshatin Pollazhan, Dibër, për të cilin nisi procedimi penal në gjendje të lirë.
Në magazinë, shërbimet e Policisë gjetën dhe sekuestruan në cilësinë e provës materiale, 733 kapsolla, 344 fishekzjarre të kalibrave të ndryshme.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
Drejtoria Vendore e Policisë Dibër, apelon për të gjithë qytetarët që të mos përdorin lëndë piroteknike, në kundërshtim me rregullat dhe me kriteret e përcaktuara në aktet në fuqi, pasi do të ndëshkohen konform ligjit.