E jashtëzakonshme/ Mirditori Adam Maca çon Shqipërinë në finalen e Botërorit të Boksit për U-16
Një rezultat i jashtëzakonshëm për Shqipërinë vjen nga Kampionati Botërori i Boksit për juniorë, aktivitet që po mbahet në Jerevan të Armenisë që prej datës 24 nëntor.
Adam Maca ka shënuar një arritje historike, duke u kualifikuar për në finalen e peshave 54-57 kg.
Boksieri i talentuar nga Mirdita, i cili është pjesë e klubit shkodran “North Boxing Albania” dhe stërvitet nga trajneri Klaudio Çekini, ka bërë një paraqitje fantastike në gjysmëfinalen e zhvilluar sot.
Ai ka mposhtur me rezultatin 5-0 kundërshtarin nga Afganistani, Amanollah Sahak.
Me një teknikë të shkëlqyer dhe grushtimin e tij perfekt, Maca u shfaq tërësisht dominues në ring, duke merituar kualifikimin për në finale.
Me këtë rezultat, Maca tashmë ka të sigurt medaljen e argjendit, por 15-vjeçari kuqezi sigurisht që do të japë gjithçka për të fituar të artën në finalen e të dielës, aty ku do të gjejë përballë rusin Platon Kozlov.
Me mbërritjen në finale, Maca ka vendosur edhe rezultatin më të lartë në historinë e boksit shqiptar në një Kampionat Botëror.
Në duelet e tij të mëparshme në Botërorin që po mbahet në Armeni, Maca fillimisht mposhti uzbekistanasit Pahlavonjon Ibrohimov me rezultatin 5-0 më 28 nëntor.
Më pas më 30 nëntor ka kaluar me sukses edhe ndeshjen e tij të dytë, teksa triumfoi me KO në raundin e dytë kundër bjellorusit Tsimor Siankevich.