Presidenti i Izraelit viziton Emiratet e Bashkuara Arabe, kërkon ndihmë për lirimin e pengjeve
Presidenti izraelit Isaac Herzog i kërkoi sot presidentit të Emirateve të Bashkuara Arabe, Sheikh Mohamed bin Zayed Al Nahyan, që të përdorë "peshën e tij politike" për të ndihmuar në lirimin e të gjithë pengjeve izraelitë që grupi militant palestinez Hamasi mban në Gaza.
Herzog e bëri kërkesën në një takim me Sheikh Mohamed në Dubai, tha në një deklaratë zyra e mediave e presidentit izraelit.
“Presidenti i bëri thirrje mikut të tij Sheikh Mohamed bin Zayed Al Nahyan që të përdorë peshën e tij të plotë politike për të promovuar dhe përshpejtuar kthimin në shtëpi të pengjeve”, thuhet në deklaratë.
Emiratet e Bashkuara Arabe janë një fuqi rajonale, megjithëse shteti fqinj i Gjirit Katari dhe Egjipti kanë ndërmjetësuar midis Izraelit dhe Hamasit për lirimin e pengjeve, gjë që deri më tani ka çuar në lirimin e 99 izraelitëve dhe të huajve.
Një raport i agjencisë shtetërore të lajmeve të Emirateve të Bashkuara Arabe tha se të dy presidentët diskutuan marrëdhëniet midis vendeve të tyre dhe çështje me interes të përbashkët.