Ndryshon ligji për shtetësinë shqiptare, festojnë edhe talentet nën 18 vjeç

Kuvendi i Shqipërisë ka miratuar ndryshimet në ligjin “Për shtetësinë”, për t’u krijuar mundësinë talenteve të sportit që kanë lindur e jetojnë jashtë Shqipërisë që të pajisen me pasaportën shqiptare. Edhe kur nuk kanë mbushur moshën 18 vjeç…

Kjo gjë u jep mundësinë të rinjve që të veshin fanellën e kombëtares në çdo disiplinë sportive.

Një ndryshim që lehtëson ndjeshëm procedurën, veçanërisht lojtarët e moshave të kombëtares së futbollit.

Për shkak se burokracitë ishin bërë pengesë e madhe për shumë lojtarë që të pajiseshin me dokumentacionin e nevojshëm.

Në të shkuarën nuk kanë munguar rastet kur futbollistë të caktuar kanë pritur me javë, duke humbur ndeshjet zyrtare, pikërisht për shkak të çështjeve burokratike.

Por ky ndryshim në ligj u krijon mundësinë që tashmë të marrin shtetësinë shqiptare, në momentin që federatat sportive do të konfirmojnë interesimin për talentet nën 18 vjeç me qëllim që të jenë pjesë e skuadrave përfaqësuese.