Eksodi i shqiptarëve/ Tabaku flet si Rama, sulmon ministren britanike Suella Braverman
Është e ditur tashmë që Edi Rama përdor çdo lloj djallëzie për t'i shpëtuar përgjegjësisë për çështje të cilat godasin drejtpërdrejt atë.
Edhe krizën e emigrantëve shqiptarë në Britaninë e Madhe tentoi ta përdredhë nga problem thelbësor i keqqeverisjes së vendit, në çështje që i përket qeverisë britanike dhe Londrës.
Edi Rama ishte i vetmi që ngriti akuza në adresë të Sekretares së Brendshme në qeverinë britanike, Suella Braverman.
Por ai nuk ishte i vetmi.
Një tjetër politikan shqiptar, këtë herë nga radhët e opozitës, përdor ndaj ministres britanike pothuajse të njëjtin leksik, duke e parë problemin te Suella Braverman dhe jo te ajo ç'ka përfaqëson Shqipëria sot, një vend i korruptuar dhe i inkriminuar deri në palcë.
Mediat britanike sërish i kanë kushtuar një artikull çështjes së emigracionit të shqiptarëve në Britaninë e Madhe. Këtë herë shkrimi lidhet me kritikat që po përballet Sekretarja e Brendshme, Suella Braverman nga deputetja shqiptare, Jorida Tabaku.
Duke folur në GB News, deputetja shqiptare Jorida Tabaku kritikoi Sekretaren e Brendshme të Mbretërisë së Bashkuar se ka përdorur gjuhë kërcënuese dhe ka sulmuar komunitetin shqiptar.
“Kam studiuar në Mbretërinë e Bashkuar dhe si shqiptare jam ndjerë shumë e kërcënuar nga komentet e saj. Si politikane, më vinte keq që komuniteti i mahnitshëm shqiptar po veçohej, sulmohej dhe ngacmohej vetëm sepse kishte një problem. Ne duhet të pranojmë se ka një problem që duhet trajtuar nga të dyja palët. Ka një problem në Britaninë e Madhe me sistemin që ekziston atje, por edhe në Shqipëri ka një problem sepse njerëzit po ikin. Rritja e shkallës së largimit të njerëzve, duhet të na bëjë ne politikanët në Shqipëri të kuptojmë se duhet trajtuar nga brenda dhe jo vetëm ta lëmë fajin në anën e Mbretërisë së Bashkuar”, u shpreh Tabaku.
GB News shkruan se "Sekretarja e Brendshme ka bërë thirrje vazhdimisht për veprime të ashpra ndaj azilkërkuesve që kalojnë Kanalin me synimin për të krijuar një jetë të re në MB".
Braverman iu referua më parë “kriminelëve shqiptarë” që ndihmonin emigrantët të kalonin Kanalin gjatë një debati në Commons vitin e kaluar, duke shkaktuar polemika dhe debate.
Çfarë tha për sekretaren britanike
Ngjarja vjen teksa kryeministri shqiptar, Edi Rama, qortoi Sekretaren e Brendshme përpara një takimi me homologun e tij Rishi Sunak, duke e cilësuar sjelljen e saj si “të turpshme”.
Duke folur për BBC, ai tha: “Për fat të keq ne e kemi parë veten dhe komunitetin tonë të veçohen në këtë vend për qëllime politike".
“Ka qenë një moment shumë, shumë i turpshëm për politikën britanike.
“Kjo ka qenë një pikë shumë e ulët në marrëdhëniet tona, por ekziston një vullnet për ta kapërcyer atë.”
E pyetur nëse komentet e Braverman ishin marrë në mënyrë të gabuar, Tabaku thotë se Sekretarja e Brendshme ka mbajtur të njëjtin tregim për një periudhë të gjatë.”
“Kjo ka ndodhur për muaj të tërë dhe ajo e ka përsëritur këtë disa herë.
“Është e vërtetë që ka shqiptarë të lidhur me krimin e organizuar, por këta janë një pakicë e një pakice.
“Shumica e shqiptarëve atje, ku ka një komunitet të madh prej 200,000 shqiptarësh, po ecin mjaft mirë.”
“Ne kemi studentë atje, kemi pronarë biznesesh dhe sipërmarrës. Minoriteti i minoritetit nuk përfaqëson më të mirën e vendit tonë.
“Këto komente u përsëritën disa herë dhe isha e lumtur kur pashë kryeministrin britanik të thoshte se i vinte keq që kjo u mor si rast”.
Qëndrimi i Londrës
Zëdhënësi zyrtar i Sunak tha: “Unë mendoj se ne padyshim do të vazhdojmë të sigurohemi që të flasim për këtë temë në një mënyrë faktike, të drejtë dhe empatike. Dhe ky është toni që keni dëgjuar nga Kryeministri gjatë gjithë kësaj.
“Ne po kërkojmë para së gjithash të ndalojmë njerëzit që bëjnë udhëtime të rrezikshme që kanë parë njerëz të humbasin jetën.”
Ai shtoi: “Ne e vlerësojmë komunitetin shqiptar në MB dhe mirëpresim çdo shqiptar që udhëton në Mbretërinë e Bashkuar ligjërisht dhe kontribuon në shoqërinë britanike.
“Sidoqoftë, realiteti është se ne po shohim aktualisht një numër të madh shtetasish shqiptarë që rrezikojnë jetën e tyre për të bërë udhëtime të rrezikshme dhe të paligjshme në Britaninë e Madhe dhe kjo i ngarkon sistemin e azilit”.