Shehaj: SPAK të hetojë Ramën dhe Xhaçkën, shpallën investitore kunatën e ministres
Deputeti i Partisë Demokratike, Agron Shehaj ka reaguar pas deklaratës arrogante që ministrja e Jashtme, Xhaçka dha pas pyetjes së gazetares së Syri Tv në lidhje me investimet të bashkëshortit dhe familjes të saj.
Shehaj ka akuzuar ministren se ka shkelur ligjet e vendit sa i përket statusit të investitorit strategjik dhe se drejtësia duhet të merret menjëherë me këtë çështje korruptive.
Postimi i Shehajt:
Është fyese për çdo shqiptar që ministrja Xhaçka me paturpësi dhe arrogancë del para mediave dhe shqiptarëve dhe thotë që asaj nuk i rëndon fare të qenurit njëkohësisht ministre e Jashtme dhe investitore strategjike e shpallur nga kryeministri.
Ministrja akuzoi sot opozitën se ka shpifur për shpalljen e bashkëshortit të saj si investitor strategjik.
Ministrja gënjen!
Cila ishte shpifja e opozitës? Që kompania AG.TCC u shpall investitor strategjik me vendimin e Ramës?
Që zoti Gaci, pronari i AG.TCC, është bashkëshort i zonjës Xhaçka?
Apo që mashtruan dhe shkelen ligjin duke përdorur kunatën e ministres për të fshehur gjurmët?
Opozita tha të vërtetën dhe tani është puna e organeve të drejtësisë që të gjykojnë mbi faktet kokëforta.
Së pari, Gykatës Kushtetuese për shkeljen e Kushtetutës dhe papajtueshmerinë e mandatit.
Dhe së dyti ,SPAK-ut, i cili duhet të hetojë shkeljen e ligjit nga Rama dhe një anëtare e qeverisë, që përdori mandatin e dhënë nga qytetarët për të pasururar veten dhe për të përvetësuar pasuritë publike.