Shiti gjakun e qytetarëve për 50 mijë lekë, procedohet mjeku në Durrës

Një mjek, teknik gjaku, në një qendër të dhurimit të gjakut në Durrës është proceduar penalisht pasi ka shitur kundrejt pagesës një qese me gjak të dhuruar nga qytetarë të ndryshëm. Po ashtu, është proceduar dhe gruaja që pagoi 50 mijë lekë për ta blerë.

Shtetasi I. Q., 50 vjeç, me detyrë Teknik gjaku, në spitalin rajonal të Durrësit, akuzohet për veprën penale “Korrupsioni pasiv i personave që ushtrojnë funksione publike”, dhe shtetësja A. S., 45 vjeçe, për veprën penale “Korrupsioni aktiv i personave që ushtrojnë funksione publike”.

Njoftimi i policisë:

Reagim i Drejtorisë Vendore të Policisë Durrës

Në lidhje me një video të publikuar në rrjetet sociale, në të cilën shfaqet një mjek i Bankës së Gjakut në spitalin e Durrësit, i cili kundrejt pagesës 5000 lekë të rinj, ndihmon një paciente për të marrë shërbimin e transfuzionit të gjakut të dhuruar nga qytetarë të ndryshëm, ju bëjmë me dije se:

Specialistët për Hetimin e Krimeve Ekonomiko-Financiare të DVP Durrës, pas transmetimit të pamjeve, referuan materialet në Prokurori dhe nisi procedimi në gjendje të lirë për shtetasit I. Q., 50 vjeç, banues në lagjen nr. 1, Durrës, me detyrë Teknik gjaku, në spitalin rajonal të Durrësit, për veprën penale "Korrupsioni pasiv i personave që ushtrojnë funksione publike”, dhe A. S., 45 vjeçe, banues në lagjen nr. 17, Durrës, për veprën penale "Korrupsioni aktiv i personave që ushtrojnë funksione publike".

Policia e Shtetit falënderon mediat dhe qytetarët që denoncojnë raste të paligjshmërive të ndryshme, si dhe i siguron ata se strukturat vendore dhe qendrore të Policisë, do të reagojnë menjëherë me qëllim nxjerrjen e autorëve, përpara përgjegjësisë ligjore.