Vrau 31-vjeçarin nga Kukësi/ Gjykata e Prizrenit lë në burg 'Kobrën'

Gjykata e Prizrenit vendosi burg me afat 1 mujor për Dibran Hoxhën dhe 5 të tjerë, pas vrasjes së 31-vjeçarit nga Kukësi, Visart Cengu. 

Në paraburgim janë lënë edhe Arben Vezaj, Burim Mazreku, Jesmir Badalli, Kujtim Gashi dhe Enver Amrallahi. 

Shkak për konfliktin që solli një të vdekur dhe një të plagosur, të dy nga Kukësi, u bë një faturë prej 400 euro në lokalin 'Kobra City', në pronësi të Dibran Hoxhës. 

Mësohet se të rinjtë kanë refuzuar të paguajnë faturën e pijeve, ç'ka ka sjellë më pas konfliktin fizik mes tyre që përfundoi me përdorimin e armës së zjarrit nga Dibran Hoxha. 

Ky i fundit qëlloi për vdekje Visart Cengun dhe la të plagosur shokun e viktimës, Rufgen Shehu.

Me ta ka qenë edhe shtetasi Arben Basha që ka shpëtuar pa plagë. Dy të mbijetuarit e ngjarjes kanë dëshmuar për policinë e Kukësit, se kishin qenë në lokalin “Cobra City” në Prizren ku kanë pasur një konflikt me pronarin. 

Pas debatit me fjalë dhe përplasjes fizike brenda lokalit të natës, palët kanë dalë jashtë dhe teksa tre të rinjtë po hipnin në automjet për t'u larguar, dyshohet se pronari Dibran Hoxhaj ka qëlluar drejt tyre.

Gjykata e Prizrenit
D.H. lihet në paraburgim, “për shkak të dyshimit të bazuar se ka kryer veprat penale: vrasje e rëndë nga neni 173 parag. 1 nënparag. 1.5, mbajtja në pronësi, kontroll ose posedim të paautorizuar të armëve nga neni 366 par.1, dhe manipulimi me prova nga neni 389 par.1 të Kodit Penal të Republikës së Kosovës”.

Ndërsa, “A.V., B.M., J:B., K.G., dhe E.A., për shkak të dyshimit të bazuar se në bashkëkryerje kanë kryer veprën penale pjesëmarrja në rrahje nga neni 187 parag. 1, lidhur me nenin 31të Kodi Penal të Republikës së Kosovës”.

Gjykata me rastin e caktimit të masës së paraburgimit ndaj të pandehurve ka vlerësuar se ekzistojnë arsyet ligjore për caktimin e masës së paraburgimit, dhe nga provat e mbledhura deri në këtë fazë, rrjedh dyshimi i bazuar se:

“I pandehuri D.H., më datë 03 janar rreth orës 04:00 e mëngjesit, në afërsi të lokalit të tij “K….C….”, që gjendet në rrugën magjistrale Prizren – Zhur, me armë zjarri, me dashje e privon nga jeta viktimën V.C., duke vë në rrezik jetën e të dëmtuarit R.Sh., të cilin e plagos dhe duke vë në rrezik edhe jetën e dëmtuarit A.B., që të tre shtetas të Republikës së Shqipërisë, në atë mënyrë që për shkak të një mosmarrëveshjeje paraprake që kishin pas rreth pagimit të faturës në lokal, fillon përleshja në mes punëtorëve në lokalin “K……C……..,”, me të dëmtuarit, ku pas kacafytjeve dhe rrëmujës së krijuar në lokal, të dëmtuarit dalin nga lokali dhe pasi hypin në veturën “……..”

………., me targa Angleze, për tu larguar, në parkingun e lokalit paraqitet i dyshuari D.H., i cili me armë zjarri shtënë në drejtim të veturës, me ç’rast e qëllon të dëmtuarin V.C., i cili kishte qenë i ulur në ulësen e pasme të veturës dhe R.Sh., , i cili kishte qenë në ulësen e përparme, si pasojë e këtyre të shtënave me armë zjarri V.C., nderon jetë rrugës për në spital të Kukësit, derisa R.Sh., nga plagët e marra nga Kukësi dërgohet në spitalin e Tiranës.

I pandehuri D.H., Se deri më datën 03 Janar 2023, e ka pasur në posedim një armë zjarri, deri më tani i tipit të panjohur,  të cilën e përdor duke shtënë – përshkuar sime lartë,

I pandehuri D.H., më datë dhe kohë të përshkruar si më lartë, e heq pajisjen e DVnga lokali i tij “K……C……”, ku kanë nisur mosmarrëveshja e përshkuar si të lartcekura. me qëllim të pamundësimit të shfrytëzimit të incizimeve në lokal që do të shërbenin në procedurën penale.

Të pandehurit A.V., B.M., J:B., K.G., dhe E.A., Më datë 03 janar rreth orës 04:00 të mëngjesit, në lokalin “K……C……”.,  marrin pjesë në rrahje pronë e të pandehurit D.H., e cila gjendet në rrugën magjistrale Prizren – Zhur, e cila rezulton me shkaktimin e lëndimeve të rënda për të dëmtuarin R.Sh.,.”,njofton Gjykata.

Kurse a do të argumentohen këto fakte do të vlerësohet në fazat e mëtejme të procedurës penale.

“Me rastin e caktimit të paraburgimit, Gjykata ka marrë parasysh faktin se me lënien në liri të pandehurit mund të të fshihen apo të ipen në arrati  me qëllim të shamngies nga përgjegjësia penale.

Duke marrë parasysh të lartcekurat Gjykata ka ardhur në përfundim se caktimi i paraburgimit në këtë fazë është i domosdoshëm dhe i arsyeshëm, duke marrë parasysh veprat penale të cilat i ngarkohen të dyshuarve dhe pasojat e rënda që kanë shkaktuar, dhe me lënien e të pandehurve në liri ekziston rreziku i kryerjes së veprave penale të tjera, andaj kjo është bazë e mjaftueshme për Gjykatën që ndaj të pandehurve të caktohet masa e paraburgimit”.

Shënim: Kundër këtij vendimi, pala e pakënaqur ka të drejtë ankese, në Gjykatën e Apelit, ankesa kundër këtij aktvendimi nuk e shtynë ekzekutimin e tij. 

LEXO: 

DOKUMENTI/ Dosja kriminale e Dibran Hoxhës me 16 dënime të formës së prerë

Ja tri akuzat për 'Kobrën'/ Dosja: Qëlloi drejt veturës në parkingun e lokalit