Pele, legjenda e futbollit brazilian vdiq në moshën 82-vjeçare - Lamtumira e fundit në mes të fushës
Legjenda e futbollit brazilian, Pele, ndoshta lojtari më i madh në histori, ka vdekur në moshën 82-vjeçare më 29 dhjetor 2022.
Ai vlerësohet se ka shënuar një rekord botëror 1,281 gola në 1,363 paraqitje gjatë një karriere 21-vjeçare, duke përfshirë 77 gola në 92 ndeshje për vendin e tij.
I vetmi lojtar që fitoi Kupën e Botës tre herë, duke ngritur trofeun në vitet 1958, 1962 dhe 1970, Pele u shpall Lojtari i Shekullit nga FIFA në 2000.
Presidenti i Brazilit, Jair Bolsonaro ka shpallur tri ditë zie kombëtare.
Pele vuante nga problemet e veshkave dhe të prostatës vitet e fundit. Ai iu nënshtrua një operacioni për të hequr një tumor nga zorra e trashë në shtator 2021 në spitalin Albert Einstein në Sao Paulo, pasi tumori u zbulua nga testet rutinë. Ai u shtrua sërish në spital në fund të nëntorit 2022.
Vajza e tij Kely Nascimento i ka njoftuar tifozët rregullisht për gjendjen e babait të saj me përditësime të rregullta në rrjetet sociale nga spitali.
Të enjten ajo postoi një foto të duarve të anëtarëve të familjes së Pele mbi trupin e tij në spital dhe shkroi: "Gjithçka që jemi është falë teje. Ne të duam pafundësisht. Prehu në paqe".
Spitali konfirmoi se Pele vdiq "për shkak të mosfunksionimit të shumë organeve, si rezultat i përparimit të kancerit të zorrës së trashë lidhur me gjendjen e tij të mëparshme klinike".
Faqja e Pele në Tëitter postoi mbrëmjen e së premtes: "Frymëzimi dhe dashuria shënuan rrugëtimin e mbretit Pele, i cili u nda nga jeta sot në mënyrë paqësore. Dashuri, dashuri dhe dashuri, përgjithmonë."
Obrigado, Rei Pelé. pic.twitter.com/2Xb7XElR41
— Santos FC (@SantosFC) December 29, 2022
Konfederata Braziliane e Futbollit tha: “Pele ishte shumë më tepër se sportisti më i mirë i të gjitha kohërave.
“Mbreti ynë i futbollit ishte eksponenti më i madh i një Brazili fitimtar, i cili kurrë nuk u frikësua kur u përball me vështirësi. Ai i premtoi babait të tij një Kupë Bote dhe na dha tre.
"Mbreti na dha një Brazil të ri dhe ne jemi shumë mirënjohës për trashëgiminë e tij. Faleminderit, Pele."
Ish-klubi i Peles, Santos, publikoi hollësi mbi funeralin e tij. Të hënën në mëngjes trupi i tij do të zhvendoset nga spitali në Estadio Urbano Caldeira të klubit, ku arkivoli do të vendoset në qendër të fushës që publiku të bëjë nderime.
Të martën, do të ketë një procesion nëpër rrugët e Santos në Sao Paulo për një varrim familjar privat.
Edson Arantes do Nascimento, i njohur më mirë si Pele, u bë një yll global kur, në moshën 17-vjeçare, ai ndihmoi Brazilin të fitonte Kupën e Botës 1958 në Suedi.
Ai shënoi golin e vetëm në një fitore 1-0 ndaj Uellsit në çerekfinale, një hat-trick kundër Francës në gjysmëfinale dhe dy në një triumf 5-2 ndaj pritësve në finale.
Pele kishte bërë debutimin e tij për klubin Santos dy vjet më parë në moshën 15-vjeçare, duke shënuar në një fitore 7-1 ndaj Corinthians de Santo Andre.
Ishte i pari nga 643 golat që ai do të shënonte për klubin në garat zyrtare gjatë 19 viteve, megjithëse Santos pretendon se totali është më shumë se 1,000 pasi të merren parasysh ndeshjet ekspozuese - shpesh kundër kundërshtarëve të profilit të lartë evropian.
Konfederata Braziliane e Futbollit dhe Santos thonë se Pele shënoi 1,283 gola në 1,367 ndeshje, ndërsa FIFA pretendon se ishte 1,281 gola në 1,366 ndeshje.