'Fermerë mbillni kanabis, jo ullinj' - Iriqi bisedon me ministren Krifca
Iriqi:-Pse thatë para ca ditësh që faji pse nuk shitet vaji i ullirit e kanë fshatarët?
Krifca:-E them prapë. Fajin e kanë fshatarët, 100%.
Iriqi:-Po Braçe ju kundërshtoi.
Krifca: - Braçe ziu kundërshton veten. Ka plot ditë që thotë do largohet, do filloka një punë tjetër e hiç. Bën ende atë që ka bërë 30 vjet rresht.
Iriqi:-Kë?
Krifca:-Lehjen. E kur do që të zgjatet i jep qafës lart e klithma i del si kuisje koneje nervozoe.
Iriqi:-Po pse janë fshatarët me faj?
Krifca:-Sepse së pari nuk duhet të mbillnin ullinj.
Iriqi:- Mbjellja e ullirit asnjëherë nuk është gabim. Se historia e tradita…
Krifca:-Ti Iriq je me të vjetrën. Ka ecur bota. Fshatarët duhej të mbillnin kanabis.
Iriqi:-Po ligji e ndalon?
Krifca:-Ndalon ata që duan ta marrin vetë gjithë fitimin. Nëse katundari paguan policinë ajo ruan parcelën dhe fshatarin. Në se paguan doganierë e nxjerr jashtë pa frikë. E në se i jep diçka prokurorit i pastron paratë me investime në fshat,qytet a bregdet.
Iriqi:- Pra po u mësoni rrugën e gabuar?
Krifca:- Po u mësoj rrugën e pasurimit. Tani le ta përdorin vajin e ullirit në plazh kundër diellit.
Iriqi:- Këtë mendim ka dhe Rama?
Krifca:-Ai kërkoi dje të ngre urgjent “Akademinë e Vajit të Kanabisit”.
Iriqi:-E ç’është kjo?
Krifca:- Si punë universiteti. Do trajnojmë fermerët që mos bëjnë vaj prej ullirit, por prej hashashit. Makineritë gati i kanë. Do ia kalojmë dhe Hollandës.
Iriqi:-Po me ullinjtë ç’do ndodhë?
Krifca:-Do heshtim sa të bëhen vaj gjithë ullinjtë.
Iriqi:-E më pas?
Krifca:-Më pas do shkojmë kontroll shtëpi më shtëpi. Do ua masim sasitë e vajit çdo familjeje dhe do u vendosim taksë për litër. Mendojmë që buxheti të fitojë afër 100 milionë euro.
Iriqi:-E ku do i gjejnë paratë fshatarët?
Krifca:-Hë për hë ashtu është. Por pas ca muajsh do i sulen farës së kanabisit dhe do gjelbërojnë male e kodra. Do lumturohemi të gjithë. Se dhe ti e di, kanabisi na bën me krahëëë, por dhe me…euro e dollarë.