Italia tregohet e gatshme për të zgjidhur tensionet Kosovë - Serbisë: Nuk duam më luftë
Prishtinë - Kryeministri i Kosovës, Albin Kurti, dje ka pritur në takim Zv.kryeministrin Antonio Tajani, njëherësh ministër i Jashtëm i Italisë dhe ministrin e mbrojtjes Guido Crosetto.
“I urova mirëseardhjen në Kosovë, zëvendëskryeministrit dhe MPJ Antonio Tajani së bashku me ministrin e Mbrojtjes Guido Crosetto. Diskutuam marrëdhëniet dypalëshe, bashkëpunimin e ardhshëm dhe interesat dhe shqetësimet e përbashkëta. Ne jemi partnerë dhe aleatë në angazhimin tonë për paqe dhe siguri”, ka shkruar Kurti në Twtter.
Zëvendëskryeministri dhe ministri i Punëve të Jashtme dhe Bashkëpunimit Ndërkombëtar të Italisë, Antonio Tajani, tha se Italia është e interesuar për paqe në Ballkanin Perëndimor.
"Unë jam optimist që në këtë rajon të ketë prosperitet, të ketë mirëqenie dhe zhvillim në këtë rajon. Vizita ime dhe e ministrit të mbrojtjes të Italisë nuk është e rastësishme, por është një mesazh që ne jemi këtu”, tha Tajani pas takimit që zhvilloi me zëvendëskryeministren e Kosovës, Donika Gërvalla në një konferencë për media, raporton RTKlive.
Ai tha se Italia është në dispozicion për të gjetur zgjidhje mes Kosovës dhe Serbisë. Me këtë rast kryediplomati italian ka porositur se nuk duhet të merren vendime të një anshme, me këtë rast ka përgëzuar Kosovën për të shtyrë vendimin për targa për 48 orë.
Ai tha po ashtu se po planifikojnë që ta organizojnë një takim në Romë, duke treguar edhe kështu dedikimin e Italisë ndaj rajonit të Ballkanit.
“Nuk dua që lufta të ndodh sërish. Të njëjtin fjalim e kam thënë edhe në Serbi. Që nga dita e parë, Kurtin që do ta takoj më vonë për t’i thënë se ne jemi të angazhuar për ta siguruar paqen. Punojmë së bashku. Të njëjtën gjë e kam thënë edhe në Serbi”, tha Tajani.
Në anën tjetër zëvendëskryeministrja dhe ministrja e Punëve të Jashtme dhe Diasporës, Donika Gërvalla, pas takimit me homologun e saj italian, Antonio Tajani, ka bërë të ditur kanë diskutuar për ndërhyrjet dhe kërcënimet e Serbisë ndaj Kosovës. Ajo tha se kanë diskutuar për ekonominë e vendit, sundimin e ligjit si dhe për luftimin e krimit të organizuar. “Biseduam rreth përparimit të Kosovës në ekonomi, sundimin e ligjit, luftimin e krimit të organizuar, për vlerat e përbashkëta Evropiane, reformën institucionale dhe rezultate e tjera që janë arritur gjatë këtij viti”, tha Gërvalla.
Ajo po ashtu tha ta ketë falënderuar homologun e saj për mbështetjen që Italia i ka dhënë Kosovës para luftës e pas saj.
“Po ashtu e falënderova që ka theksuar përsëri që Italia do të mbetet një shtyllë e fuqishme për sigurinë dhe paqen në rajon e Kosovë. Biseduam për përpjekjet e Serbisë për destabilizimin e Kosovës përmes ndërhyrjeve masive në çështjet e brendshme të vendit tonë, kërcënimeve me dhunë e deri të kërcënimet me luftë”, tha Gërvalla.
Kryediplomatja Gërvalla pati kritika për ecurinë e dialogut në të kaluarën Kosovë-Serbi, duke shtuar se pati gabime për çka tha se do të mundohen bashkë me aleatët te mos përsëriten më.