Formula 1/ Mercedesi arrin triumfin e parë sezonal
Piloti britanik George Russell fitoi sot Çmimin e Madh të Brazilit në Formula 1, garë e zhvilluar në pistën e Interlagos.
Ky është triumfi i parë sezonal për makinën Mercedes, që arriti edhe një vend të dytë me 7 herë kampionin e botës, Lewis Hamilton.
Një triumf i merituar për Russell, në një garë që e dominoi gjatë gjithë kohës, duke mos e lëshuar kreun edhe kur në pistë hyri dy herë makina e sigurisë.
Ky është triumfi i parë në karrierë për Russell, që të shtunën pati fituar edhe garën sprint.
Në podium, bashkë me dy pilotët e Mercedesit, u ngjit edhe spanjolli Carlos Sainz me Ferrari.
Gara e Brazilit ishte spektakolare, me aksidente që në startin e saj, ku nuk mungoi edhe një kontakt mes Verstappen e Hamilton.
Kjo bëri që strategjitë e skuadrave në përdorimin e gomave të jenë të ndryshme.
Hyrja e makinës së sigurisë edhe 15 xhiro nga fundi e bëri mjaft të bukur fundin e garës.
Ferrari shpresoi shumë për fitoren, por nuk mundi të rivalizojë dot me Mercedes.
Charles Leclerc, që pas xhiros së parë përfundoi në fund pas një kontakti me Norris, e mbylli garën në vendin e katërt.
Ai fitoi terren ndaj Sergio Perez (Red Bull), që u rendit i shtati, pas shokut të tij të skuadrës Max Verstappen (i gjashti) e Fernando Alonso (i pesti).