Inceneratori i Fierit/ Rama mbron vjedhjen 23 milionë euro: Është vepër e rëndësishme!
Kryeministri Edi Rama gjatë takimit me qytetarë të Fierit u ndal dhe tek denoncimet e opozitës për megaaferën e inceneratorëve.
Sipas tij, nuk mund të kriminalizohet një vepër reale dhe prekshme për banorët e Fierit si impianti i mbetjeve. Rama mes të tjerash theksoi se është një vepër e rëndësishme dhe e prekshme në jetën e banorëve të Fierit, edhe pse në realitet ai nuk funksionon.
Rama merr në mbrojtje inceneratorët pikërisht në momentin kur SPAK po heton disa denoncime për aferën totale prej 430 milionë euro.
Vetëm për inceneratorin e Fierit zhvatja përllogaritet në 23 milionë euro, vjedhje e cila vijon çdo ditë pasi shteti vazhdon të paguajë për gërmadhat që nuk funksionojnë.
Edi Rama: "Ju kujtohet se çfarë bëhej këtu apo jo? Njëherë këtu kam jam unë, ishte llum, nuk kishte fare asgjë. Atëherë si bëjmë? Vetëm duke ecur drejtë dhe duke bërë më të mirën. Si mundet ne ta pranojmë se një vepër kaq e rëndësishme? Kaq domethënëse dhe kaq reale, e prekshme në jetën e banorëve të Fierit, për mushkëritë e fëmijëve, të të moshuarve dhe të të gjithë atyre që jetojnë në Fier, siç është impianti i trajtimit të mbetjeve. Ai na ka dhënë mundësinë ta fshijmë atë kodrën e turpit të plehrave që rrinte aty dhe qelbte gjithë ajrin e Fierit prej 30 vjetësh. Ai të kriminalizohet për shkak se në procesin e ndërtimit të këtyre impianteve ka pasur veprimtari korruptive? Si mund të flitet për 450 milionë euro? Si mund të vidhen paratë që nuk janë derdhur? Si mund të flitet? Është një përrallë. Impianti është aty dhe kodra që tymoste, nuk është aty. Nëse nisemi në një rrugë për të arritur një objektiv dhe në atë rrugë dikush nga ne bën 2 rrugë, edhe punën për objektivin edhe punën për xhepin e vet. Ne të tjerët nuk mund të përbaltemi njësoj. Ai e ka vendin diku tjetër, nuk e ka vendin në rrugën tonë dhe ata që bëjnë të tilla, ata dënohen. Nuk kriminalizohet rruga jonë e përbashkët dhe gjithë puna që ne bëjmë. Veprat që ne ndërtojmë janë aty dhe janë në shërbim të njerëzve, këto janë prona publike", tha Rama.