Deputeti i Bashës pranon se është takuar me Ramën: U përshëndetëm! Jemi të qytetëruar

Deputeti i Lulzim Bashës, Arbi Agalliu ka takuar në një lokal në Lungomare të Vlorës, kryeministrin Edi Rama.

Vetë Agalliu ka konfiormuar takimin me Ramën, pas publikimit të fotove. 

Ai thotë se takimi ka qenë rastësor, ndërsa shton se me Ramën është përshëndetur. 

Edi Rama ka intensifikuar lëvizjet për t'u afruar me grupin e deputetëve që mbështesin Lulzim Bashën.  

Ja si shprehet Arbi Agalliu:
“Nuk ka asgjë më shumë sesa duket në foton e nxjerrë si sensacion nga specialistët e manipulimit dhe të dhunës verbale e fizike. Është një përshëndetje 2 muaj më parë (13 nëntor), siç këmbehen 2 njerëz në të njëjtin mjedis dhe kaq!

Në kulturën dhe formimin tim nuk kam asnjë kompleks të përshëndes këdo. Në jetën time profesionale kam takuar dhe do takoj pafund njerëz me bindje të ndryshme politike, me pozicione të ndryshme e statuse të ndryshme. I besoj sjelljes qytetare dhe profesionale!

Me Edi Ramën nuk kam bërë kurrë asnjë pazar, asnjë marrëveshje, asnjë cënim të interesit publik!

Nga një anë më vjen keq që bëjnë qimen tra. Nga ana tjetër, më vjen mirë që kanë kaq shumë interes për aktivitetin tim politik dhe privat.

Të tilla lajme të sajuara keq i konsideroj si përpjekje shumë idiote për shantazh! Le të vazhdojnë! Unë kam zgjedhur të punoj për një të ardhme më të mirë për Partinë Demokratike dhe për vendin”, shprehet.