Zgjerohet hetimi për skandalin e pagave, SHISH dhe Antiterrori angazhohen…
Prokuroria e Tiranës zgjeron hetimin mbi skandalin e publikimit të të dhënave të pagave të afro 690 mijë qytetarëve. Pas arrestimit të 4 personave, tashmë po hetohet edhe oligarku rus Oleg Viktorovich Boiko, duke bërë që në këtë çështje, të angazhohen edhe institucione të tjera të inteligjencës dhe sigurisë kombëtare.
Dalja në skenë e emrit të Moskovitit, Oleg Viktorovich Boiko, ka zgjeruar hetimin e prokurorisë së Tiranës, duke bërë që në këtë çështje të angazhohen dhe institucione të tjera të inteligjencës dhe sigurisë kombëtare.
Prokuroria e Tiranës që po udhëheq hetimin e dosjes së nxjerrjes në publik të databazave të rrogave të 690 mijë shqiptarëve dhe të huajve, ka aktivizuar në këtë hetim dhe Shërbimin Informativ Shqiptar, Shërbimin Informativ Ushtarak dhe një strukturë të Policisë së Shtetit, që është është Antiterrori.
Të treja këto zyra të sigurisë kombëtare janë angazhuar nga prokuroria e Tiranës, për të mësuar rreth aktivitet real të Endri Ikonomit dhe dy shtetasve rusë, Oleg Viktorovich Boiko dhe administratorit të kompanisë “Credit 2 ALL”, Vlado Cvetkosvki.
Nga verifikimet që ka kryer Ora News rezulton se oligarku rus me shtetësi Italiane, Oleg Boiko, deri në muajin shtator ka qenë fizikisht në Shqipëri.
Kjo pasi prokuroria e Tiranës ka verifikuar sistemin Tims si dhe ka sekuestruar një sërë dokumentash, ku Boiko ka firmosur në shtator të pranojë dorëheqjen e administratorit, Endri Ikonomi, dhe në vend të tij të emërojë dhe prezantojë rusin, Vlado Cvetkosvki.
Kompania e oligarkut rus ushtron aktivitet në zonën e “Komunës së Parisit”, ndërsa funksioni i saj lidhet me faktin e ofrimit të shërbimit për ndërtimin e produkteve të ndryshme elektronike për institucionet financiare dhe kredidhënese.
Por tashmë roli i tyre në Shqipëri, pok shihet me mjaft pikëpyetje nga strukturat e inteligjencës, të cilat kanë vënë në skaner pronarët dhe punonjësit e kësaj kompanie.
Aktualisht njëri nga drejtorët e kompanisë, Endri Ikonomi, është arrestuar nga prokuroria për akuzën e korrupsionit aktiv, ndërsa pritet që ai të verifikohet me imtësi edhe për veprimtari kundër rendit dhe sigurisë kombëtare.
Kompania shqiptare “Piressa Holdings Limited” është blerë me 100 euro nga oligarku rus, ndërsa tashmë kapitali i saj ka shkuar tek 400 milion lekë.
Emri i kompanisë, doli pikërisht sapo prokuroria e Tiranës arrestoi drejtorin e saj, Endri Ikonomin, si njeriun që kishte korruptuar me 200 mijë apo 300 mijë lekë specialistin e IT të Tatimeve dhe AKSHI-it për marrjen e databazave të pagesave të çdo muaji për 690 mijë shqiptarë e të huaj.
Kjo solli dhe arrestimin më pas të specialists tjetër të AKSHI-t, Eni Qirjako dhe pronarit të kompanisë “Smart Collection”, Klodian Sota./Elton Qyno, ora/