Që nga 'Sirena e Vogël' deri te 'Mbretëresha e borës', përrallat marrin jetë në muzeun e Hans Cristian Andersen
Danimarka po nderon shkrimtarin e saj më të famshëm, Hans Christian Andersen, me një muze të rinovuar që synon të zhysë vizitorët në botët e fantazisë që ai krijoi.
Vizitorët janë shprehur të kënaqur me muzeun e ri, i cili u rihap në verë dhe i pa punimet e rinovimit të përfunduara në dhjetor, pak para se të mbyllej si pjesë e përpjekjeve të Danimarkës për të luftuar një rishpërthim të COVID.
Që nga "Sirena e Vogël" deri te "Mbretëresha e borës", veprat e Andersen - të cilat autori i quajti "fëmijët" e tij - kanë frymëzuar filma të panumërt të Disney-t, balet, këngë dhe libra.
Në një transformim magjik me të cilin do të krenohej çdo kumbarë zanash, autoritetet e qytetit kanë mbikëqyrur një rinovim shtatëvjeçar të muzeut në një kompleks të gjerë sipër dhe poshtë rrugëve me kalldrëm të qytetit të vjetër të Odense.
Historia e jetës së Andersen është endur përmes ekspozitave, të cilat përshkruajnë fillimet e tij modeste si fëmijë i një rrobalarëseje analfabete dhe i një këpucari të varfër.
I lindur në 1805 dhe duke humbur të atin në moshën 11-vjeçare, Andersen u largua nga Odense tre vjet më vonë dhe u nis për në kryeqytetin e Danimarkës, Kopenhagen, ku ëndërroi të bëhej aktor.
Deri në kohën e vdekjes së tij në 1875, Andersen kishte krijuar 158 përralla dhe 800 poezi, duke provuar suksesin më pas falë popullaritetit të përrallave, përfshirë "Rrobat e reja të mbretit" dhe "Gishtëza e vo".
Artefaktet kanë ende vendin e tyre në ekspozitën e re e ndër to boja e shkrimtarit dhe një gotë shampanjë që iu dha atij nga Jenny Lind, një këngëtare suedeze që e refuzoi propozimin e tij për martesë.
"Një univers më i madh"
Pas hyrjes në muzeun e riprojektuar, vizitorët lëvizin nëpër vilën modeste ku Andersen kaloi fëmijërinë e tij në fillim të viteve 1800, përpara se të përfshihen në një hapësirë të madhe nëntokësore kushtuar tregimeve të tij - e mbushur me animacione, ekspozita interaktive dhe muzikë.
Muzeu i ri i projektuar nga arkitekti japonez Kengo Kuma - i njejti që projektoi stadiumin e ri olimpik të Tokios - u hap në verë, por puna u përfundua vetëm në fillim të dhjetorit.
Me dy të tretat e hapësirës së ekspozitës nën tokë, arkitekti u frymëzua nga "Çakmaku", përralla e njohur e Andersenit, në të cilën zgavra e një peme doli se ishte një portë për në një botë nëntokësore.
“Ideja pas dizajnit arkitektonik është e ngjashme me metodën e Andersenit, ku një botë e vogël transformohet papritur në një univers më të madh”, tha Kuma.
Punimet nisën në vitin 2014 pas mbylljes së një rruge kryesore që la hapësirë në dispozicion për kompleksin e ri.
Muzeu i vjetër, i cili qëndronte që nga viti 1930 në shtëpinë ku lindi Andersen, u mbyll në fund të vitit 2017.
Që nga rihapja, 40,000 njerëz kanë kaluar nëpër dyert e tij. Por masat e reja të sigurisë Covid të prezantuara në dhjetor nënkuptonin që ai duhej të mbyllej edhe një herë, dhe numri i vizitorëve u pakësua ndjeshëm nga rënia e turistëve të huaj.