Italia drejt zgjatjes së gjendjes së jashtëzakonshme, ja deri kur
Qeveria Draghi po përgatitet të zgjasë gjendjen e jashtëzakonshme shëndetësore të paktën për tremujorin e parë të 2022.
Nga data 31 janar 2020, Italia ka zgjatur këtë “rregull” i cili përdoret në rast të ngjarjeve të jashtëzakonshme, si tërmete, përmbytje apo siç ndodhin me rastin e Covid-19.
Por dekreti që e vendos atë ka vendosur gjithashtu kufij kohorë që do të thyhen në vitin 2022 dhe do të kërkohet një rregull parësor për ta bërë këtë.
Shtyrja e kufirit 24 mujor- Për të zgjatur gjendjen e jashtëzakonshme në vitin 2022, qeveria italiane do të duhet ta bëjë këtë me një rregull parësor, pasi nuk do të mund të zgjasë më atë aktuale. Gjendja e jashtëzakonshme, e cila zgjidhet nga Këshilli i Ministrave me propozimin e Kryeministrit, rregullohet nga paragrafi 3 i nenit 24 të Kodit të Mbrojtjes Civile ku thuhet se “kohëzgjatja e gjendjes së jashtëzakonshme të rëndësisë kombëtare nuk mund të kalojë 12 muaj dhe mund të zgjatet jo më shumë se 12 muaj të tjerë”. Megjithatë, në rastin e gjendjes së jashtëzakonshme për Covid-in, zgjatjet e mundshme përfunduan tashmë në korrik 2021 dhe kjo pasi gjendja e parë e jashtëzakonshme u miratua për 6 muaj dhe jo për një vit. Në thelb, gjendja e jashtëzakonshme skadoi më 31 korrik 2020, më pas u zgjat me një vit shkruan TG.com
Çfarë do të thotë gjendja e jashtëzakonshme - Gjendja e jashtëzakonshme miratohet nga këshilli i ministrave me propozim të Kryeministrit në marrëveshje me guvernatorët dhe presidentët e krahinave autonome përkatëse. Ai përgatitet në rast të ngjarjeve të jashtëzakonshme, si tërmete, përmbytje ose siç ka ndodhur për Covid-19. Ndër rezolutat e para të CDM-së është ajo e identifikimit të burimeve financiare për fillimin e ndërhyrjeve më urgjente. Me gjendjen e jashtëzakonshme autorizohen edhe urdhëresat e mbrojtjes civile në mënyrë që të mund të veprohet urgjentisht dhe me kompetenca të jashtëzakonshme për mbrojtjen e qytetarëve. Mund të realizohen edhe ndërhyrje të veçanta me urdhëresa në shmangie nga dispozitat e ligjit, duke respektuar parimet e përgjithshme të sistemit juridik.
Procedurat e thjeshtuara burokratike - Me shpalljen e gjendjes së jashtëzakonshme, procedurat për miratimin e ligjeve dhe dekreteve racionalizohen. Gjithashtu janë rregulluar masa shëndetësore, si detyrimi i maskave në natyrë apo distancimi social. Për më tepër, qeveria mund të përdorë, dekrete që nuk kalojnë në miratim parlamentar.
Komisioneri i jashtëzakonshëm - Zgjatja e gjendjes së jashtëzakonshme mban gjallë organet e krijuara për të përballuar pandeminë, përkatësisht komisionerin e jashtëzakonshëm dhe Komitetin Shkencor Teknik. Ky i fundit u krijua më 5 shkurt 2020 me urdhër të Ministrisë së Shëndetësisë italiane dhe më pas u modifikua në përbërje më 17 Mars 2021.