Gazetari: Berisha, politikani më i vlerësuar në SHBA, 'Foltorja' e nesërme pritet me interes të madh

Gazetari shqiptar nga me banim në New York Beqir Sina, ka folur për 'Foltoren' e cila do të mbahet nesër nga ish-kryeministri Sali Berisha, me mbështetësit e tij në SHBA.

Ai tha se Berisha është një nga politikanët më të vlerësuar nga diaspora në SHBA dhe takimi i nesërm si çdo takim tjetër është pritur me interes të madh nga ata.

"Ish-presidenti Berisha ka një popullaritet të madh në Shqipëri dhe në Kosovë, pavarësisht dritëhijeve të veta në 30 vite, ai mbetet politikani më popullor për diasporën. Berisha ka pasur vazhdimisht popullaritet në SHBA, ardhjet e tij këtu janë pritur gjithnjë me interes të madh, i është rezervuar pritje shumë miqësore.

Foltorja është njoftuar përmes rrjeteve sociale, nesër në 12 në Nju Xhersi, në një prej hoteleve këtu, do të ketë takim përmes një videoscren, direkt me Berishën nga SHBA. Doja të thoja diçka, pse u zgjodh ky vend? Për të shfrytëzuar një konferencë të ngjashme me foltoret që Berisha ka mbajtur në Tiranë, arsyeja e dytë është që të tregojnë mbështetjen e shqiptarëve. Berisha është politikani më i vlerësuar", tha Sina nga SHBA.

Gazetari shtoi se "Yuri Kim i ka premtuar Lulzim Bashës që do të bëhej kryeministër, dhe për shkak të humbjes së zgjedhjeve, u tentua një bashkëqeverisje, kundërshtari më i madh i të cilës ishte vetë Berisha".

“Goditja e Berishës ka marrë një formë tjetër, formën e një sulmi, i cili ka qenë i gjithanshëm, nga brenda dhe nga jashtë, flas për politikën e brendshme të Shqipërisë. Kundërshtarët kanë shfrytëzuar vendimin e DASH për të bërë një sulm ndaj Berishës, për fat të keq në këtë sulm u përfshi dhe vetë kreu i PD-së Lulzim Basha, i cili ra pre e presionit", tha ai.

Kujtojmë se “Foltorja”e radhës e ish-kryeministrit Sali Berisha do të mbahet ditën e nesërme në orën 17:00 të pasdites me demokratët shqiptarë në SHBA.