Talibanët mohojnë se Zv.Kryeministri i tyre, mulla Baradar, ka vdekur
Talibanët kanë mohuar se një nga udhëheqësit e tyre më të lartë është vrarë në një shkëmbim zjarri me rivalët, pas zërave për përçarje të brendshme në grup gati një muaj pas fitores së tyre rrufe mbi qeverinë e mbështetur nga Perëndimi në Kabul.
Sulail Shaheen, një zëdhënës i talebanëve, tha se mulla Abdul Ghani Baradar, ish-kreu i zyrës politike të talebanëve i cili u emërua Zv.Kryeministër javën e kaluar, dha një mesazh zanor ku hidhte poshtë pretendimet se ai ishte vrarë ose plagosur në një përleshje.
"Ai tha se janë gënjeshtra dhe krejtësisht të pabaza", tha Shaheen në një mesazh në Tëitter.
Talibanët gjithashtu publikuan video pamje që supozohet se tregojnë Baradarin në takime në qytetin jugor Kandahar. Reuters nuk mundi t’i verifikojë pamjet.
Ky mohimet vjen pas disa ditëve thashetheme se përkrahësit e Baradar ishin përplasur me ata të Sirajuddin Haqqani, kreut të rrjetit Haqqani që është i vendosur pranë kufirit me Pakistanin dhe fajësohet për disa nga sulmet më të këqija vetëvrasëse në luftë.
Thashethemet pasojnë spekulimet mbi rivalitetet e mundshme midis komandantëve ushtarakë si Haqqani dhe udhëheqësve nga zyra politike në Doha, si Baradar, të cilët udhëhoqën përpjekjet diplomatike për të arritur një marrëveshje me Shtetet e Bashkuara.
Talibanët i kanë mohuar vazhdimisht spekulimet mbi ndarjet e brendshme.
Baradar, dikur i parë si kreu i mundshëm i një qeverie talebane, nuk ishte parë në publik për një kohë të gjatë dhe nuk ishte pjesë e delegacionit ministror që u takua me Ministrin e Jashtëm të Katarit, sheik Mohammed bin Abdulrahman Al-Thani të dielën në Kabul.
Udhëheqësi suprem i lëvizjes, mulla Haibatullah Akhundzada, gjithashtu nuk është parë në publik që kur talebanët morën Kabulin më 15 gusht, megjithëse ai lëshoi një deklaratë publike kur u formua qeveria e re javën e kaluar.
Spekulimet mbi udhëheqësit talebanë janë ushqyer nga rrethanat që lidhen me vdekjen e themeluesit të lëvizjes, mulla Omar, e cila u bë publike vetëm në vitin 2015 dy vjet pasi ndodhi, duke nxitur akuza të ashpra midis udhëheqjes.