Dasho: Ku dhe pse u blenë votat kur sheh rezultatet e kandidatëve

“Kur sheh rezultatet për votat e kandidatëve, pamja bëhet shumë e qartë. Janë blerë vota në Tiranë, Durrës dhe Elbasan sepse aty PS kishte mundësinë më të madhe për të krijuar diferencën me PD-në”, gjykon analisti, Dr. Erion Dasho,

“Janë blerë vota edhe në Lezhë dhe Shkodër sepse aty duhej ulur diferenca. PD në një konkurrim të ndershëm mund të arrijë një rezultat plus 3 në të dy qarqet, - shprehet ai dhe argumenton:

“Në 7 qarqet e tjerë, aty ku nuk ka as edhe çudira në rezultate, nuk ka patur nevojë të investohet në blerje votash sepse rezultati ka qenë i përcaktuar dhe shumë i vështirë për t'u ndikuar.

Për komentuesit që kanë qejf të hyjnë në debate të kota, nuk po pretendoj se zgjedhjet u fituan nga njëra palë apo u humbën nga tjetra për shkak të blerjes së votës, por po shpreh bindjen time se, bazuar tek leximi i rezultateve, blerja e votave është 100% e sigurt që ka ndodhur masivisht në pesë qarqet e mësipërm. Turp më të madh për Shqipërinë e shekullit të 21-të që ende pretendon të hyjë në Europë, nuk mund të ketë...” nënvizon dr. Erion Dasho.