Arrestohet autori që plagosi me thikë policin pranë qendrës së votimit

Është arrestuar Mikel Lleshaj, autori që plagosi me thikë efektivin e policisë,Gëzim Osmanaj, në qendrën e votimit në Fushë-Arrëz.

Ngjarja ndodhi gjatë mbylljes së procesit të votimit, në momentin e mbërritjes në QV nr. 0399.

Lleshaj është me preçedentë të mëparshëm penale.

32-vjeçari nuk kishte lidhje me procesin zgjedhor, teksa ai është bezdisur nga prania e efektiveve jashtë ambienteve të QV-së.

Ai ka pasur një konflikt të çastit me efektivin Osmanaj, ku më pas e ka qëlluar me thikë.

Njoftimi i policisë:

Plagosi me thikë punonjësin e Policisë në krye të detyrës, kapet në kohë rekord autori.

Shërbimet e Komisariatit të Policisë Pukë, menjëherë pas ngjarjes së ndodhur në fshatin Bardhet të Njësisë Administrative Qafë Mali të rrethit Pukë, ku u plagos me thikë një punonjës policie që ishte në krye të detyrës, organizuan punën dhe falë kontrolleve dhe reagimit të menjëhershëm bënë të mundur që në kohë rekord të lokalizohej, kapej dhe arrestohej autori i plagosjes, shtetasi Mikel Lleshaj, 32 vjeç, banues në fshatin Qafë Mali, Pukë.

Ky shtetas, rreth orës 19:00, gjatë mbylljes së procesit të votimit, në momentin e mbërritjes në QV për të shoqëruar kutitë e votimit dhe materialet zgjedhore, ka plagosur me mjet preres (thikë), punonjësin e Policisë G. O., i cili ndodhet në spital jashtë rrezikut për jetën.

Materialet do t’i kalojë Prokurorisë së Rrethit Gjyqësor Pukë, për vepren penale “Vrasja e punonjësve të Policisë së Shtetit” mbetur në tentativë.