Artistët: Nuk kemi asnjë kompromis me Veliaj. Ruajtja e Teatrit Kombëtar është e panegociueshme

Artistët kanë përgënjeshtruar edhe njëherë kryebashkiakun Veliaj, se mes tyre dhe bashkisë ka një marrëveshje për teatrin

Aktori Arben Derhemi lexoi sot në emër të të gjithë artistëve deklaratën., ku thuhet qartë dhe saktë se nuk ka asnjë marrëveshje mes palëve, ndryshe nga sa është paraqitur në media.

Ja deklarata e Artistëve:

DEKLARATË E SINDIKATËS SË ARTISTËVE TË SKENËS DHE EKRANIT (SASE) DHE SINDIKATËS SË PAVARUR TË ARTISTËVE TË TEATRIT KOMBËTAR (SPATK)

Dje, kryetari i Bashkisë Tiranë, z. Erion Veliaj, gjatë një takimi privat me kryetarin e SASE, z. Alert Çeloaliaj, ka ftuar artistët të marrin pjesë në një dëgjesë të organizuar prej tij, me artistë dhe arkitektë, të hënën e ardhshme.

Sot, mediat kanë raportuar deklaratat e z. Veliaj, sipas të cilit jemi shumë pranë arritjes së një kompromisi për pranimin e idesë së shembjes së ndërtesave historike të Teatrit Kombëtar dhe Teatrit Kombëtar Eksperimental.

Për sa më lart, sqarojmë se:

Së pari, nuk ka në horizont asnjë kompromis, madje asnjë afrim në pozicionet e palëve. Sindikatat mbeten të vendosura në qëndrimin e tyre, se ndërtesat historike të Teatrit Kombëtar dhe Teatrit Kombëtar Eksperimental duhet të shpallen monument kulture dhe, pas një debati të gjerë publik, me pjesëmarrjen e arkitektëve, konstruktorëve, restauratorëve, artistëve por edhe qytetarëve, të merret vendimi nëse ato duhet të rikonstruktohen, apo restaurohen. Çdo opsion tjetër, është i panegociueshëm për ne!

Së dyti, me deklaratat e sotme, z. Veliaj ka e kompromentuar dëgjesën pa filluar ende. Ai nuk vjen për të dëgjuar, pra, duke qenë i hapur edhe të tërhiqet nga pozicioni i tij fillestar, por për të na bindur, ose manipuluar.

I kujtojmë zotit Veliaj, se sindikatat e artistëve iu përgjigjën ftesës së tij të parë për dëgjesë dhe morën pjesë masivisht. Mbi 90% e folësve në atë dëgjesë u shprehën kundër ndërtimit të teatrit të ri, mbi truallin e teatrit të vjetër. Dy ditë më pas, z. Veliaj bëri një farsë, me nëpunës të shtetit dhe arkitektë e inxhinierë përfitues të fondeve, ku spikasnin drejtori i Institutit të Ndërtimit, ish-kryetari i diskredituar i Shoqatës së Arkitektëve dhe autorët e projektit “Turbina”. Asnjë zë kundër nuk ishte ftuar në atë dëgjesë. Z. Veliaj, u mundua ta shiste këtë si dëgjesë finale me këtë grup interesi. Tani z. Veliaj po mundohet të shesë farsën e radhës si mundësinë e sheshimit të divergjencave dhe arritjen e kompromisit final.

Në këto kushte, sindikatat e artistëve refuzojnë të bëhen pjesë e farsës së radhës, rezultati i së cilës është paracaktuar nga organizatori dhe i bëjnë thirrje të gjithë artistëve, arkitektëve dhe qytetarëve të Tiranës ta bojkotojnë këtë farsë.

Sindikatat e artistëve mbeten të vendosura për dialog, në të mirën e komunitetit të artistëve dhe interesit më të mirë publik, mbrojtjen e trashëgimisë dhe kursimin e fondeve publike që krijohen nga taksat e shqiptarëve. Për këtë qëllim, ne e ftojmë z. Veliaj në një dëgjesë të hapur, në sallën e Teatrit Kombëtar, me një panel artistësh, arkitektësh, restauratorësh dhe intelektualësh, të ftuar nga sindikatat. Në dëgjesë do të jetë e mirëpritur edhe zonja ministre e kulturës, së cilës ia kemi drejtuar këtë ftesë qysh në 8 shkurt.

Duke marrë parasysh axhendën e ngjeshur të z. Veliaj dhe znj. Kumbaro, ua lemë atyre në dorë të caktojnë datën dhe orën e dëgjesës. Nëse ftesa jonë do të refuzohet ose injorohet, publiku do ta ketë shumë të qartë se kush është për dialog, e kush për diktat, kush është për mbrojtjen dhe kush është për grabitjen e pronës publike, kush e mbron dhe kush po i ve kazmën trashëgimisë sonë kulturore.

Ne jemi këtu, në sheshin e Teatrit. Ju presim!